Puare Italie

Storie taliane

Par chescj 15 di Avost, ch’o sin in feriis a gjoldisi un fregul di mâr e di soreli, o vin pensât di fâ fevelâ un glemonàs di gale: Josef Marchet (1902-1966), predi e inteletuâl, che tal lontan 1950, subit dopo de vuere mondiâl, al scrivè chest articul. A son passâts 60 agns, ma lis robis no son cambiadis gran. Almancul nus pâr.

Di vizin e di lontan
Nol pò jessi vêr che i sorestanz di un Stât a’ fàsin a pueste di governâlu malamentri o che vebin gust di fâ dutis lis robis ledrôsis. Dopo dut, al è ancje lôr interes di contentâ plui int che puedin, massime co la lôr permanenze sul cadreghin ‘e dipent pôc o trop ancje de volontât dal popul. E alore si pò crodi che ancje il guviâr talian di cumò al ciri di fâ miôr ch’al pò par judà lis centmil dibisugnis di cheste biade nazion.
Ma al à tre quatri pecjs tal mani che lui imberdein, in part riditadis dai guviârs passâz, in part nassudis de situazion di dopo la uere. La prime ‘e je la venalitât vergonzôse de burocrazie che no si môf se no si onzin lis ruedis. E no si trate nome dal machinari metût adun sot la steme dal manarin (il «fascio» ndr): si trate ancje dal personâl ch’al è dibot in ogni ufizi chel istes di prin, cun chê stesse mentalitât, cun chei stes vizis, e plen di speranze e di voe di conservâ dute la sô paronanze sul andament di dutis lis cjôssis.
Un’altre grande pecje ‘e je chê di subordinâ dut al interes dal partît. E pazienze ancjmò se si cjalàs nome il vêr interes dal partît, che dopo dut al è l’interes di un grum di int: il mâl al è chest, che masse dispes si crôt che al sei interes dal partît chel ch’al è nome interes di une persone influente o di une criche di gramulons; e altris voltis si va daûr des ombris o dai scrupui di qualchidun ch’al viôt la code dal diaul in duc’ i sîz, ch’al crôt di jessi svelt a fâ simpri l’incontrari di ce che oressin fâ chei che son di un altri tròp.
Un’altre ancjmò ‘e je la pocje risuluzion dai parons dal vapôr che son simpri sclâs dal “tabù” nazionalistic, che no son rivâz adore di dispueâsi des superstizions patriotichis dal secul passât ne di chês dai “vinc’agn”, che no viòdin une quarte di là dal nâs e invezi di cjalâ l’interes coletîf di uê e di doman, si làssin ancjmò indrezzâ di chel spirt militaristic e imperialistic che nus à menâz te buse.
Ma se ancje dutis chestis pecjs a’ vignissin eliminadis, a’ndi restares un’altre che bastares di bessole a fâ lâ strucje ogni buine intenzion e a fâ strassâ malamentri la plui part des risorsis. E ancje cheste ‘e je propri tal mani.
Milions e miliarz a’ jessin ogni dì des cassis dal Stât: milions e miliarz nestris, gjavâz des nestris venis, parcè che il Stât nol è un cjamp di forment, ch’al bute un tant al an. Lavôrs publics, cuntribuzions, sovenzions par une opare o par chê altre, par tignî in pîs barachis distinadis a sdrumâsi, par metint sù altris provisoris che no podaran durâ ne zovâ, par contentâ mil gramulis spalancadis, par fâ tasê mil protestis e mil lemenz. E cun ce criteri il guviâr fasial la sielte tra tantis domandis e tantis pressions? No cul criteri des plui grandis necessitâz nè de premure nè de vere utilitât: ma nome cun chel de plui pôre e daûr des sburtadis di qualchi persone plui influent o daûr des onzudis plui bondantis di cui ch’al à plui… onzint. Dut al dipent di alzâ une vore la vôs, magari fasint nassi qualchi disòrdin, ò di vê un bon santul a Rome, ch’al sepi mostrâ lis robis de bande juste. Cussi uê al ven sovenzionât un istitût, ch’al à salacôr mancul dibisugne di altris cent; al ven inviât un lavôr colossâi di pocje o di nissune utilitât; al ven strassât un capitâl a fâ propagande nazionalistiche o a ingrassâ gjornai e rivistis in mans di fassisc’, che spàndin il lôr tuessin indulà che lares fate opare di pacificazion e di concuardie.
E cun dute la buine volontât, nol pò jessi diferent, fintremai che dut al partis di Rome e dut ai finis a Rome. Rome ‘e cognòs dutis lis robis par sintilis a dî: dut al dipent di savêlis contâ, di savê fâ viodi e massime di savê fâ pôre. Dut al dipent di vê là jù une buine vôs che zighi a fuart e che no si lassi mancjâ il flât.
Cetantis carognadis o macacadis di mancul no vignaressino fûr, se la sielte e la distribuzion ‘e vignissin fatis plui da vizin, sul puest, regjon par regjon, indulà che lis necessitâz e lis urgenzis a’ puedin jessi cognossudis e misuradis diretamentri, e indulà che duc’ si podares tignî di vôli la ministrazon di chei miez ch’a’ son di duc’?

[Gjavât fûr di: Josef Marchet, Gramulis, poltronis e balis. Editoriâi de “Patrie” 1950-1951, Clape di Culture Patrie dal Friûl, Glemone 2001. La grafie doprade e jè chê origjinâl dal autôr]
[Dissen di Marco Martellini]

Tag: ,

I Commenti sono chiusi