Il furlan no si difint cui tais

Tais di vin

Il Friûl al à tantis vôs ch’a procurin di tegnî vive la lenghe furlane. Ma se la lenghe no jentre te comunicazion mass-mediatiche, ducj lu sa, a mûr. Television, radio, internet a son struments vitai par promovi e tutelâ une lenghe piçule come la nestre. Par chest, in linie cun ce ch’al sucêt in altris isulis lenghistichis in Europe e tal mont, tal 1996 a fo fate buine la leç di tutele n. 15, li che si proviodeve di valorizâ sore dut scuele e informazion. Nissun guviêr regjonâl no si à mai butât in cuatri par finanziâ il furlan, lu savìn. Però cualchi fruçon lu àn dât (uns 4/5% dai finanziaments totai pe culture). Cumò, invezit, in chest moment di crisi economiche, si tae. Sore dut li che (politichementri) nol conven. Cussì, pal 2010, lis dôs plui impuartantis vôs furlanis dal etere, Radio spazio 103 e Radio onde furlane no varan nissun contribût, a pet dai 200 mil euro di an passât.
Lu à decidût la zonte regjonâl di Renzo Tondo, sostignude di PDL, UDC, Partît dai pensionâts e Leghe Nord. Chê stesse Leghe Nord che si svante di prudelâ e valorizâ lis culturis locâl, e che invezit al è deventât un partît nazionalist e xenofobic. Ancje chei che une volte si spaçavin par difensôrs des diferencis e dai patrimonis locâi, cumò a tasin. Adatâts a une politiche cence respîr. Nol è cui berlis cuintri dai Rom e cul folclôr che si difint «une storie, un passât, une tradizion», come ch’al diseve Pasolini. Ma cun progjets e azions inteligjentis. E cualchi franc.
[CHI il comunicât stampe dal Comitât 482]

Tag: , ,

I Commenti sono chiusi