I vues di Diu

Colomba

Aldo Giavitto al è un professôr di talian e latin tal Liceu sientific «Magrini» di Glemone. Ma al è ancje un «songwriter», come ch’i plâs definîsi. Sabide ai 2 di Otubar, al à vinçût il prin premi dal «Festival della canzone friulana 2010» [] cu la cjançon «I vues di Diu», interpretade di Megan Stefanutti. Di timp nol scriveve plui par furlan, parcè che – come ch’al dîs tal so blog [] – «le derive oltranziste di certe frange “talebane” della lingua e cultura friulane mi stanno provocando più di un’orticaria». Ma al à decidût distès di partecipâ al «San Remo» dal Friûl. Lu à fat cuntune cjançon pôc politically correct. Cuntun test su la frutine musulmane muarte tal Ospedâl di Udin za fa doi mês e ch’e je stade sapulide tal cimitieri di Padiâr, te zone riservade a lis personis di religjon islamiche. Cualchi conseîr de Leghe Nord al veve berlaçât: «vogliamo forse che il nostro cimitero si trasformi in un ricettacolo di salme musulmane venute da ogni dove?» [] Chei de Leghe a vevin ancje cjapât sù firmis cuintri dal cimitieri musulman. E cussì Aldo Giavitto i à dedicât la sô cjante al cuarp profanât di chê piçule fantacine. Forsit la int che lu àn votât no àn scoltât ben lis peraulis e lu àn fat dome pe cualitât e pal coinvolgiment musicâl. Ma nô o volaressin pensâ, come l’autôr, che magari «no», che la int lu àn sielzût propit par chel test. Parcè ch’e àn capît che pierdi la caritât umane, il valôr des diferencis, il dirit di ducj a preâ il Diu ch’a vuelin, al è inmorâl, pericolôs e stupit. Al è il prin pas par deventâ come lis bestiis. Chel pas che cierts politics nostrans al pâr ch’a vedin za fat.

Tag:

I Commenti sono chiusi