Saurs furlans

Gnognosaurs

Doman, ai 3 di Avrîl, e cole la Fieste de Patrie dal Friul, par celebrâ chel lontan 1077, cuant che l’imperadôr Indrì IV – chel di Canossa – al concedè al Patriarcje di Aquilee Sigeart di Belstein l’investiture feudâl cun prerogativis ducâls. In chel moment al nassè il Principât gleseastic di Aquilee, une sorte di proto-stât furlan. Par 3 secui, fintremai al 1420 cuant che Vignesie lu concuistà, il Friûl al podè vivi l’unic moment di autonomie politiche de sô storie. Une date di ricuardâ in dì di vuê – cuintri di ogni forme di nazionalisim talian, padan o friûl-julian – inte logjiche di une Europe dai popui, policentriche, vierte a dutis lis culturis, lis lenghis e lis identitâts, vecjiis e gnovis, cence confins di stâts anacronistichis e pericolôs.
Ancje il Comun di Glemone al à inmaneât cualchi iniziative par celebrâ chescj 3 di Avrîl. Doman a lis 5 e miege sot sere a Palaç Elti si screarà la mostre sui «Gnognosaurs» [], lis strichis in lenghe furlane dissegnadis di Dree Venier, che al à publicât di resint il secont volum cu lis storis dai «saurs» furlans [].
Miercus ai 6 dî Avrîl, invecit, a lis 5 sot sere tal Auditorium di San Michêl il grop «Coccolastorie» al proponarà «Fevele furlan, fevela a colôrs»: leturis di flabis e proiezions di strichis animadis par fruts. La ministrazion comunâl e à in program ancje la publicazion di 1.000 block notes, di dâ fûr ai fruts di Glemone, cun detulis e sprocs par prudelâ la lenghe furlane. E sperìn – cheste volte – ch’a no copiin [].

Tag:

I Commenti sono chiusi