Leteradure par iphone

Iphone

Si puedial scrivi un romanç in tre riis? A pararessin propit pocjiis, se nol fos che Felix Fénéon (1861-1944), scritôr e anarchic francês, al à scrit un libri intîr di romançs di tre riis [], anticipant lis modalitâts di comunicazion de ete contemporanie, dai sms, des email, di une vite simpri plui svelte e «minimâl». Une idee fate buine dai Colonos, la clape culturâl di Vilecjace di Listice [], ch’e propon pal secont an il gnûf concors leterari dal titul «In tre riis». La competizion e proviôt la selezion di tescj di narative par furlan cuntune lungjece massime di 180 batudis, cjapant dentri ancje i spazis. Dôs lis possibilitâts di spedizion des voris: sms e email.
La prime edizion dal concors, tal 2010, le vevin vinçude i scuelârs de seconde H de scuele mezane «Manzoni» di Udin. Cun chest romanç: «Un barbon al sta murint di frêt a N.Y. Al passe un siôr e i lasse une borse plene di bêçs. Il barbon, par scjaldâsi, al bruse ducj i bêçs te Borse». Leteradure minimâl, leteradure dal timp di vuê.

Tag:

I Commenti sono chiusi