Pe Regjon il furlan nol covente

Bandiere patriarcjine

Ancje tes piçulis robis – ma ch’a tocjin derits fondamentâi – si po tamesâ la serietât e la coerence di une classe politiche. Cualchi zornade indaûr il conseîr regjonâl Paolo Menis al veve presentât un ordin dal dì par impegnâ la maiorance a riconossi il master “Insegnâ in lenghe furlane”, organizât de Universitât di Udin, tant che titul culturâl pes graduatoris a esauriment, ch’a coventin par nomenâ i suplents. Si voleve cussì fâ cressi e valorizâ la professionalitât e lis competencis dai insegnants, in line cu la leç 482 dal 1999, ch’e à rindût aplicabil l’articul 6 de Costituzion e ricognossût al furlan il status di lenghe tutelade. Siben che ancje Renzo Tondo al vessi declarât che i insegnats a son la risorse principâl par promovi il furlan, il consei regjonâl al à decidût di no tegnî cont dal ordin dal dì e di no sburtâ il Ministeri de Istruzion a ricognossi il valôr dal plurilenghisim e des lenghis minoritariis te scuele. Chest a pet di grancj discors su l’identitât, di “parons a cjase nestre”, di nainis su la specialitât. E intant che la maiorance in consei regjonâl e dineave chescj derits ai insegnants di chenti, Danilo Narduzzi, referent dal grop consiliâr de Leghe Nord, si è svantât di vê gjavât vie 522 mil euro destinâts ae inmigrazion e di vêju metûts tal capitul istruzion e culture. Solite demagogjie, insome, di un guvier regjonâl che no si spiete l’ore ch’al vadi cjase.

Tag: ,

Un Commento a “Pe Regjon il furlan nol covente”

  1. Anonimo scrive:

    … tant che par chel nazional.