Tal non di Checo Placerean

Pre Checo Placerean

25 agns fa al murive pre Checo Placerean, predi, insegnant e politic furlan. Al jere nassût a Montenars. A Glemone ancjemò tancj di lôr si ricuardin di lui, de sô vôs e dal so spirt ferbint. Tal 1976, cualchi mês dopo dal taramot, al veve dit che in dîs agns i furlans a saressin rivâts adore di tirâ sù il Friûl e a saressin tornâts in pîts. Al veve capît plui e miôr di tancj sorestants il caratar de int di chi e la fuarce ch’a vevin dentri.
In chescj dîs di plui bandis si ricuardarà la sô opare e il so pensîr. Si tache usgnot, li dal palaç de Provincie di Udin aes 5 e miege cu la convigne “Tal non di pre Checo. 25 agns daspò”. Sabide e Domenie cu ven e sarà la volte di Montenars, cuntun conciert e la messe in ricuart di Placerean. Si finissarà Miercus ai 23 di Novembar, a lis 9 tal teatri San Zorç di Udin. L’atôr Fabiano Fantini al presentarà il spetacul teatrâl “Il sium di une Patrie
Di bande nestre, nus plâs di ricuardâ cheste figure che tante part e à vût te “epiche” de ricostruzion dal post-taramot, pal so grant lavôr di traduzion de Bibie in marilenghe e par vê sburtât i furlans a dâ une fonde culturâl, lenghistiche e storiche ae lôr identitât.
A son profetichis ancjemò in dì di vuê lis sôs peraulis sul Friûl e su l’Europe ch’al scrivè intal 1966, in timp di “vuere frede” e di mûr di Berlin: «O crodìn ch’al sedi vitâl pal Friûl inmaneâ relazions culturâls, economichis, sociâls cui cunfinants dal Nord e dal Est, no dome dal Ovest: relazions che no sedin sclavis dai mudaments de politiche pal forest fate di cui no ’ndi pae lis conseguencis, come che nus tocje a nô. O olsìn slungjâ chestis relazions in prospetivis che nus fasin insumiâ une sole Europe politiche, cun tantis musis e, fra chestis, la nestre» (“Une gnove resistence par salvâ il Friûl”, in Friuli d’oggi, Avost, 1966).
[CHI il program des inizitivis par memoreâ i 25 agns de muart di Placerean]
[CHI matereâi su Placerean]
[Inmagjine: dissen di Gianni Di Lena]

Tag: ,

I Commenti sono chiusi