Prejudizis furlans

Bandiera del Friuli

Covential propit insegnâ la lenghe furlane intes scuelis? No saressial miôr che i fruts a imparassin l’inglês, o magari, parcè di no, il cinês, e lassâ il furlan tal contest de famee? E i gjenitôrs, no fasaressino miôr a fevelâ dome che une lenghe ai lôr fruts, che se di no a fasin confusion e a “furlanizin” chel pôc di talian ch’a imparin sui bancs? Po, cu la crise economiche ch’o vin devant, parcè straçâ bêçs publics par chestis nainis lenghistichis invecit di investîju par cjossis plui impuartantis? Domandis. Spieli che su la lenghe furlane o vin tancj prejudizis e preconcets, no simpri a scuare. Tant che ogni tot di agns al scuen saltâ fûr cualchi libri di sienziâts, inteletuâi e lenghiscj ch’a procurin di sfantâ la mitologjie de lenghe uniche (magari “nazionâl”), par ribadî il valôr des lenghis minoritaris e dal plurilenghisim.
Doman di sere, Vinars ai 20 di Zenâr, te suage de manifestazion “Leimi” inmaneade de Pro Loco, de clape “Osterman” e dal Sportel pal Furlan dal Comun di Glemone, a lis 8 e miege in Palaç Elti, al vegnarà presentât il libri Cjalant il Friûl. Pinsîrs e opinions sui lûcs comuns de lenghe furlane, curât di Priscilla De Agostini e Silvana Schiavi Fachin. Il volum, publicât de Forum di Udin, al pant i intervents di doi esperts di lenghistiche, Tullio De Mauro e Nereo Perini, e 13 intervistis a scritôrs, inteletuâi e studiôs (Eleanor Callanan, Novella Cantarutti, Pierluigi Cappello, Adriano Ceschia, Lucija Čok, Valer Colle, Lorenzo Fabbro, Furio Honsell, Xavier Lamuela, Domenico Lenarduzzi, Carlo Puppo, Sergio Salvi e Leonardo Zanier). Opinios e propuestis par capî che ogni lenghe – ancje la plui piçule – e jè un derit, un patrimoni, une oportunitât culturâl, economiche e sociâl. Coventavial dîlu?

[Inmagjine gjavade fûr di www.babelblu.blogspot.com]

Tag: ,

Un Commento a “Prejudizis furlans”