Ancje la lenghe e à i siei dirits

Lenghe

Il Comun di Glemone, in colaborazion cul Sportel Sorecomunâl pe lenghe furlane dal Glemonàs e cu la Societât Filologjiche Furlane, al organize un “Cors pratic di lenghe e culture furlane”. Il cors, ch’al durarà par 12 lezions di dôs oris ognidune, al sarà curât di Fausto Zof e al frontarà argoments sicu la grafie “normalizade”, la gramadie di base e la traduzion. La zornade e l’orari a saran definîts cui corsiscj (preserâl o serâl), tacant cul incuintri di presentazion dai 30 di Març dal 2012. Lis iscrizions al cors si puedin fâ dentri di vuê, Lunis ai 19 di Març, indreçansi al Sportel Sorecomunâl pe Lenghe Furlane dal Glemonàs [CHI].
L’iniziative e cole intun moment delicât pe lenghe furlane e, plui in gjenerâl, pes lenghis minorizadis, che in Italie a son plui di une desine (sloven, cravuat, albanês, catalan, grêc, ladin, ocitan, sardegnûl, todesc, francês e francoprovençâl, …). In chescj dîs il Consei dai ministris al à fat bon un disen di leç in mert ae Cjarte europeane des lenghis regjonâls o minoritariis [], prin pas pe ratifiche dal document che il Consei d’Europe al à fat bon 20 agns indaûr e che il Stât talian al à firmât tal 2000. Cumò i tocje al Parlament di Rome votâlu e cheste si spere ch’e sedi la volte buine. E sarès un’altre dimostrazion – s’e covente inmò une – che i “parons dal vapôr” dai ultins 10 agns, soredut i leghiscj (ancje furlans) ch’a si son jemplâts la bocje di Europe dai popui, di identitât e di valôr des “lidrîs”, a àn dome striçât cevole tai voi de int, cence bati un claut in fat di dirits “reâi” des minorancis lenghistichis e dal popul furlan.

Tag:

I Commenti sono chiusi