“Spending review” pai furlans

Friul

Daspò 13 agns de leç 482/99 ch’e à ricognossût plen derit a lis lenghis mancul pandudis di sei tuteladis, cul decret numar 95 su la spending review il Guvier talian al à decidût di declassâ e discriminâ lis minorancis lenghistichis. Cussì furlan, sardegnûl, ladin, ocitan e altris a son tornâts a sei pal Stât talian nuie altri che “dialetti”. Une decision ch’e va cuintri dai plui elementârs dirits dai singui e des comunitâts, cuintri dal articul 6 de Costituzion republicane, cuintri de Cjarte europeane des lenghis mancul pandudis, cuintri de Declarazion universâl dai Derits umans.
Par chest i conseîrs regjonâi dal Partît Democratic Paolo Menis, Gianfranco Moretton, Franco Brussa, Sandro Della Mea e Mauro Travanut a àn presentât la mozion “Azions in difese de dignitât de lenghe furlane”, passade cul vôt dal Consei cuasi ae unanimitât (si son astegnûts dome che Antonio Pedicini e Paolo Santin dal Pdl). Tal document si domande ae Zonte regjonâl di meti in vore dutis lis iniziativis pussibil par difindi e tutelâ i derits lenghistics dal popul furlan, tacant cu la impugnazion des normis su la spending review devant de Cort Costituzionâl.
«Cul decret dal Guvier – al à dit Paolo Menis fevelant par furlan te aule dal Consei – si scancelin agns di storie, impuarìnt il mont de scuele e ancje l’autonomie dal Friûl. E une volte vierzude la strade de censure culturâl, si po tacâ cun altris setôrs. Il ricognossiment de minorance lenghistiche furlane al è un element fondamentâl par difindi l’identitât di popul e al è une des resons plui evidentis pal mantigniment de specialitât regjonâl». Peraulis che no si po no condividi.
[Foto: Zâl e blu, Luca Laurati (particolâr)]

I Commenti sono chiusi