Autonomie par mût di dî

Acuile

La campagne eletorâl pes elezions regjonâl e jè scomençade. E parie i slogan dai contindints. Pal plui pôc di sest, come che aromai o sin abituâts. Bufulis par imbussulâ la int, impen di judâle a capî di ce bande votâ cun programs concrets e responsabii. Fra dutis lis sflocjis, une nus à fat plui câs di altris. Chê da “autonomie”. Renzo Tondo, candidât pal PdL, al sta metìnt adun une liste di ispirazion “autonomiste”. Ancje cualchi politic nostran i fasarà part, grampât su la strade di Damasc de «specialitât regjonâl», dal «fasìn di bessoi» e da «i nestris bêçs a cjase nestre». Ma cuale idee di autonomie aial Tondo tal cjâf? Cuale ese seont lui la fonde culturâl, politiche e sociâl ch’e po garantî il nestri dirit di sei “autonims” e “speciâi”?
Domandis legjitimis, parcè che Tondo al è un furiôs nimì de lenghe furlane. I furlans a àn simpri pensât, anzit sintût, che la lôr “specialitât” e “diference” a vessin la lôr fonde te lenghe, parie cu la storie e la lôr “vision dal mont”. E invecit, propit orsere, Tondo, cjargnel di Tumieç, vie par une trasmission radiofoniche de Rai regjonâl si è sbrocât disint: «Quando il mio predecessore (Riccardo Illy, ndr) volle fare una legge per il friulano, pensai che aveva fatto una cazzata». E no content, criticant la leç 482/99 ch’e tutele lis lenghis di minorance in linie cul dirit european, al à continuât: «Al massimo queste cose si potevano fare quando eravamo nei tempi dell’abbondanza. Nella prossima legislatura dovremmo mettere il naso in queste questioni».
Ma saial Tondo ce ch’e dîs la Costituzion taliane tal articul 6 («La Repubblica tutela con apposite norme le minoranze linguistiche»)? Aial mai let l’articul 3 dal Statût de Regjon autonime Friûl-vj («Nella Regione è riconosciuta parità di diritti e di trattamento a tutti i cittadini, qualunque sia il gruppo linguistico al quale appartengono, con la salvaguardia delle rispettive caratteristiche etniche e culturali»)? Si esal domandât ce ch’a podaran pensâ i miârs di paris e di maris ch’a àn volût pai lôr fîs l’insegnament de lenghe furlane a scuele?
O podìn dome sperâ che la campagne eletorâl, cun chestis bufulis indecentis, e finissi biel prest. E che si puarti vie, plui lontan possibil, chescj “autonomiscj-par-mût-di-dî”. [ru]

Tag: ,

6 Commenti a “Autonomie par mût di dî”

  1. Anonimo scrive:

    Par no fevelâ da ‘macro regione del nord’.
    Tondo nus a vendûs a Vignjésie e a Milan par quatri votos da Leghe: altri che specialitât!

  2. Lucio scrive:

    Poben o vin fat une sane riflesion su ce mût che la pense il cjargnel Tondo, de lenghe furlane e relative autonomie de nestre Regjon. Cumò mi plasares savee, altretant, ce mût che la pense la Debora Serracchiani, nasude a Rome e che no sa fevelâ par furlan, ma ca volares comandâ in Friul. Augurinsi però che disi le veretât!! Lucio

  3. Trespul scrive:

    @ Lucio

    Ancje se a mi Illy no mi à mai plasût cuissà ce bisugne ameti par amôr da veretât che al crodeve ta tutele da lenghe furlane e ta sô valorisassion. Idem Honsell. Ancje se a no savevin cjacarâle. I leghiscj e Tondo invese no an fat nuie di bon pal furlan ma dome par emplâ lis lôr pansis. Mi fidi plui da Serracchiani che di cheste gjestre malandrete che a dinee lis sôs lidrîs!!!!

  4. Lucio scrive:

    @ Trespul
    Fiditi tu, io no di sigûr. Che le colpe e seti di Tondo e dai leghiscj, ie vere. Le colpe ie simpri di chel che al fâs, mica di chel ca nol fâs nuie. Come che tu dîs, no son dubis invesit sul bon lavor di Illy, ma lu vees subit metût da bande. Po dopo, che la sinistre e seti stade promotor de autonomie furlane o ai plui di qualchi dubi. Forsit e volevin costruî ancje in Friûl le autonomie des coperativis rosis? Simpri pal ben de int sintint. Par chel cal riguarde emplâ lis pansis le miei tasei, no pensi che qualchidun in ducj chescj ains al veti digiunât; no mi risulte. Lucio

  5. Vigji scrive:

    Al di là di Tondo, che purtrop al à simpri manifestât il so disinterès pal furlan, ma ce che a mi fâs plui ridi a je la Lee Nord. Tondo al dîs che la leç di tutele dal furlan dal 2007 a je une cazzade, e nissun dal Cjaroç al dîs nuje!!! O ricuardi che cuant che a àn fat chê leç alì, i conseîrs de Lee Nord, le àn votade stant che a jerin in oposizion. Che si vergognino e che la fermedino di menânus pal cûl!!!

  6. Luca scrive:

    la vere cazzade a je la autonomie di Tondo. fin a chê altre dì fedel servitôr di Berlusconi, e cumò che il partît al crole bisugne inventâsi une altre cazzade par cjapâ i votos da int. a je ore di finîle!